منتدى علم الروحانيات

منتدى علم الروحانيات تساعدك على فهم وتعلم جميع ما يدور حولك واكتشاف ما وراء الحجب وتساعدك على الامور الصعبة بسهولة جدا
 
الرئيسيةمكتبة الصورس .و .جالأعضاءالمجموعاتبحـثالتسجيلدخول

شاطر | 
 

 من رباعيات الشاعر الكبيرعبدالرحيم منصور(رباعيات الحكمه)

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المستهتر
عضو نشط وفعال
عضو نشط وفعال


عدد الرسائل : 13
العمر : 57
تاريخ التسجيل : 09/03/2010

مُساهمةموضوع: من رباعيات الشاعر الكبيرعبدالرحيم منصور(رباعيات الحكمه)   الثلاثاء مارس 09, 2010 5:21 pm

[center]
[ رباعيات الحكمة ]

1- على كل لون الحياه

على كل لون يا بشر

بشر بتخلق حياه

وبشر بتقتل بشر

Ө Ө Ө

2- على كل لون الدموع

دموع فرح وأنين

دموع فى غربال سبوع

ودموع في قلب حزين

Ө Ө Ө

3- على كل لون العرق

على كل لون السنين

عرق يبيض ورق

وعرق يندي الجبين

Ө Ө Ө

4- على كل لون يا خلق

على كل لون تطلعوا

سودتوا لون الحق

وكرهتوا كون ترجعوا

Ө Ө Ө

5- جاهل يا طامع فى رمال

عمرك كضلك يفوت

فوق ذكرى حلوه حلال

بدل الضلال والسكوت

Ө Ө Ө

6- ياللي غويت الليالي

خايف عليك من حبالها

ليبقى حالك ده حالي

وتدوق حرامها وحلالها

Ө Ө Ө

7- دايماً قليل البخت

بلاقي في الكرشه عضمه

لفيت كتير واتملخت

ومشيت بأحزاني هدمه

Ө Ө Ө

8- دربك بسيط يا خال

وعيونه زي المرايه

إن طال وأصبح محال

يبقى بداية غنايا

Ө Ө Ө

9- البحر يا مراكبي مايل

ولا شراعك خفيف

عمال فى الموج تحايل

والريح فى ضهرك مخيف

Ө Ө Ө

10- البر قدام عينك

لو لحظه رايقه تشوفه

في الضيقه ربي شريك

تلقى كفوفك كفوفه

Ө Ө Ө

11- تبت حبالك وبحر

ويا الرفاقه المليحه

في الشده وياك تشمر

وتعدي لايام مريحه

Ө Ө Ө

12- أوعى تريح وترسى

وتقول ده آخر المطاف

الدنيا مالهاش مرسى

والحمل فوق الكتاف

Ө Ө Ө

13- أوعى يا خيال تميل

عمر الخيول ما بترحم

لا حيرمي سرجه الخيل

ولا حتى على صاحبه يندم

Ө Ө Ө

14- يا صاحبي عافر إن

لم يحظى حلمك بمرسى

ده العمر مالوش سن

والدنيا قدامنا لسه

Ө Ө Ө

15- جوه النقوش القديمه

بهتانة حكمة زمان

شبه الغريم والغريمه

لونها ولون الحيطان

Ө Ө Ө

16- الحكمه من غير شفايف

قول يا حكيم القبيله

بترتعش ليه وخايف

مالناش غيرك وسيله

Ө Ө Ө

17- سمعت حكمه وقلت

يا هلترى مين كاتبها

قالوا الألم والكبت

والصمت هوه صاحبها

Ө Ө Ө

18- الليل ده عالم وعالم

عالم وساتراه بيوت

عالم بيعسكر بعالم

وعالم ماهوش لاقي قوت

Ө Ө Ө

19- هات من جرابك وقوللي

يا اللي إنت عارف البعيد

وأديني سدرك يا خلي

سدرك كأنه العيد

Ө Ө Ө

20- عالم وبودان كبيره

سامعه وماهيش سامعه

الضحكه بتساوي حيره

والفرحه بتساوي دمعه

Ө Ө Ө

21- سوا في الطريق السهل

أو في طريق الصعب

جاي بالورود والفل

بكره لجموع الشعب

Ө Ө Ө

22- أنا كلمه منها الحقيقه

سابتني ليه الخلايق

وحدي ومن غير شقيقه

عريانه بين الشقايق

Ө Ө Ө

23- سموني باسم الحقايق

سموني باسم التراب

وارموني وسط الخلايق

أقتل نغم كداب

Ө Ө Ө

24- أيام علينا تعدي

وتمر مثل السحاب

وإحنا بناخد وندي

ونبيع لبعض العذاب

Ө Ө Ө

25- عايش على دى الحال

ألف وأتعب لحالي

وكل ما أسأل سؤال

يرجع لي تانى سؤالي

Ө Ө Ө

26- أنا شلت حمل صديقي

وشلت همه وجروحه

ونا لوحدي في ضيقي

وهوه عايش لروحه

Ө Ө Ө

27- مازرعتش الورد عمري

وباشم ريحة عبيره

أه ع اللي يزرع ما يدري

ويجني لكن لغيره

Ө Ө Ө

28- سدري بينهج كرب

وعيوني عواميد نور

تهل على درب

دعوه وورد وسرور

Ө Ө Ө

29- قليل كلام الحزين

لكنه في القلب طامي

لا له لسان أو إيدين

لكنه له طلق حامي

Ө Ө Ө

30- والله بسيط يا خال

كما دمعتي ف كمي

وشديد كأني رجال

ولاهمني همي

Ө Ө Ө

31- ياما صحاب وصحاب

ليا ونا فرادي

لما باقع في العذاب

يرخوا العيون والأيادي

Ө Ө Ө

32- يابو العيال النحيفه

والقلب أخضر مراعي

عيني زيك كفيفه

لكني شايف شراعي

Ө Ө Ө

33- دعوة أبويا وأمي

إني أعيش قلقان

لا إيد تحايل فى كمي

والباب قصادي بيبان

Ө Ө Ө

34- في عروقي زعق السكوت

زعق في قلبك يا خلي

فتح بيبان البيوت

لقيت سكوتها بيغلي

Ө Ө Ө

35- البذره مره يا خال

طرحت لنا غيط مرار

حرام ده ولا حلال

تجني المرار ع الديار

Ө Ө Ө

36- باقي وطامي يا نيل

دعا في العيون الغريبه

تضحك وتصرخ تميل

فرح وقسوه وطيبه

Ө Ө Ө

37- أنا سدري غيط حنه

وقلبي ده كروان

بحلم وباتمنى

يكون ملاذ إنسان

Ө Ө Ө

38- إفتح يا برج الحمام

سدرك وشم الهوى

خلي هديل الكلام

فيه الشفا والدوا

Ө Ө Ө

39- كرهت أكون في البيت

وأطل م الشباك

لا أشم نسمة غيط

ولا أرتوي بالهلاك

Ө Ө Ө

40- الصبح طالع شباب

طالع يغربل عذابه

والرزق زي الرباب

بيدق بايدينه بابه

Ө Ө Ө

41- الزرع أهوه طالع

والشمس راحله لبعيد

والفل أهو والع

في السدر زي النشيد

Ө Ө Ө

42- قال الشجر للريح

يا ريح يا قتاله

فروعي تتعب تصيح

للأرض مياله

Ө Ө Ө

43- أدى الحياه بلا وقفه

عايزه القلوب البصيرة

ملايين تسير دفه

خطوه في قلب السيره

Ө Ө Ө

44- اللي يخطي كتير

الوقت يبقى بتاعه

لو خاض ف بحر كبير

يملك سفاينه وشراعه

Ө Ө Ө

45- لما يهل الصباح

تفرك عيون الطريق

لحظه تقابلنا جراح

ولحظه تاخدنا صديق

Ө Ө Ө

46- عارفك يا بكره وشايفك

جاي من عيون الناي

أخضر وحالفه شفايفك

تلمس وليدي الجاي

Ө Ө Ө

47- الدنيا والله براح

قليل عليه أكون

طيره طليقة الجناح

وأخلق لنفسي كون

Ө Ө Ө

48- جوايا زحمه وبيوت

وصوت غريب الندا

با أصرخ في عز السكوت

وأتلاشى ويا المدى

Ө Ө Ө

49- كام دنيا جوايا راحت

باسألك يا طريق

ضي الحقيقه اللي لاحت

حقيقي ولا بريق

Ө Ө Ө

50- يا طيري إرجع لبيتك

الضلمه براه جداد

إفرد جناحك في غيطك

على قد زاد الديار

Ө Ө Ө

51- بشد القلوع .. شديت

البحر جزر ومد

بحرت لما رأيت

الشوف ملهوش حد

Ө Ө Ө

52- ذكرى في حياتنا تدوم

لحظه تطول أو تقصر

بين أمس ويا اليوم

تقل الحمول بيأثر

Ө Ө Ө

53- دي لحظة الذكرى ياما

نسعد بها أو نشقى

لو حتى كانت غمامه

نزول وهي بتبقى

Ө Ө Ө

54- يا خطوه زمنك صعب

ياترجعي .. ياتسيري

بتحمليني الرعب ..

راح تحملي مين غيري ؟!

Ө Ө Ө

55- انا ماشي وياكي لا ..

إنتي اللي ماشيه بيه

انا جوه قلبي خلا ..

في الزحمه بتشدي فيه

Ө Ө Ө

56- دق الشتا ع البيبان

هجت عيون المحاجر

عريان لكين دفيان ..

شقيان بحلمي المهاجر

Ө Ө Ө

57- الصمت هجر البيوت

تحت الغطا يا ليل

جوه عروق السكوت ..

برد الشتا بيسيل

Ө Ө Ө

58- يا مدينه من غير عيون ..

خدي عيوني شوف

برد الشتا مجنون

على القلوب بيلوف

Ө Ө Ө

59- البحر هجر المراكب ..

ونا ح أروح لك كيف

غيم الشتا مواكب

وف قلبي حر الصيف

Ө Ө Ө

60- في الليل بتطرح نجوم

جنة سمايا طرح

ملهاش ايدين في الغيوم

ملناش ايدين في الفرح

Ө Ө Ө

61- مشينا ع السكه نحلف

إني ما نخلف عهد

لما الشدايد بتصدف

ما حد يسند حد

Ө Ө Ө

62- إخترت أكون نفسي

مطرح ما أروح بتروح

بين يومي بين أمسي

نفس الحقيقه روح

Ө Ө Ө

63- في إيديها شنطة ولابسه

المريله والكوله

شمس الطفوله دايسه

ليل أمنا الغوله

Ө Ө Ө

64- بحلم في يوم أطول

أسكن في بيت قديم

وأدبل وأدوب وأزول

وأنزف في جرح أليم

Ө Ө Ө

65- بحلم أكون موجه

ع الشط نتعس ساعات

وأهرب من الهوجه

من خنقة العمارات

Ө Ө Ө

66- بحلم بك إنت يا كون

تصير في لحظه قلب

سرك أكيد مكنون

وبتعرف إمتى تحب

Ө Ө Ө

67- بحلم وفي الحلم رحله

بحلم في عالم غريب

بحلم ومش لاقي راحه

من القريب .. والغريب

[b]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
الشيخ باسم
عضو متميز وفعال
عضو متميز وفعال


عدد الرسائل : 398
العمر : 49
تاريخ التسجيل : 04/08/2009

مُساهمةموضوع: رد: من رباعيات الشاعر الكبيرعبدالرحيم منصور(رباعيات الحكمه)   الجمعة أبريل 09, 2010 4:01 am

شاااااااااااااااعر طموح
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
الشيخ باسم
عضو متميز وفعال
عضو متميز وفعال


عدد الرسائل : 398
العمر : 49
تاريخ التسجيل : 04/08/2009

مُساهمةموضوع: رد: من رباعيات الشاعر الكبيرعبدالرحيم منصور(رباعيات الحكمه)   الإثنين نوفمبر 15, 2010 9:24 am

اعاده الله علينا بالخير واليمن والبركات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
من رباعيات الشاعر الكبيرعبدالرحيم منصور(رباعيات الحكمه)
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى علم الروحانيات :: منتدى قصائد الشعر والنثر والقصص والروايات :: قسم قصائد الشعر والنثر-
انتقل الى: